2 верасня Рэспубліка Беларусь святкавала юбілейны XXV Дзень беларускага пісьменства, які ў гэтым годзе прайшоў у горадзе Іванава Брэсцкай вобласці. Галоўным лейтматывам святочных мерапрыемстваў стала тэма «Мая малая радзіма».
Дзень беларускага пісьменства традыцыйна праводзіцца ў першую нядзелю верасня ў гістарычных і культурных цэнтрах нашай краіны, непарыўна звязаных з жыццём знакамітых дзеячаў Беларусі розных часоў.
Першы Дзень беларускага пісьменства адбыўся ў 1994 годзе ў горадзе Полацку, на радзіме Францыска Скарыны – беларускага і ўсходнеславянскага першадрукара, філосафа-гуманіста, пісьменніка. У розныя гады свята адзначалася ў Тураве, Навагрудку, Нясвіжы, Оршы, Пінску, Заслаўі, Мсціславе, Міры, Камянцы, Паставах, Шклове, Барысаве, Смаргоні, Хойніках, Ганцавічах, Глыбокім і іншых гарадах − культурных цэнтрах Беларусі. У 2017 годзе сталіцай свята, прымеркаванага да 500-годдзя беларускага кнігадрукавання, зноў стаў старажытны Полацк.
У аснову Дня беларускага пісьменства пакладзена ідэя прапаганды здабыткаў айчыннай пісьмовай культуры, пераемнасці духоўных традыцый. Свята дала ўнікальную магчымасць сустрэцца з жывым словам, удзельнікамі працэсу напісання кніг, выдання газет і часопісаў.
Невыпадкова і тое, што Дзень беларускага пісьменства праводзіцца ў першыя дні новага навучальнага года. Адукацыя, інфармацыя і культура − тры галіны, якія фарміруюць інтэлектуальную эліту нацыі, яе духоўны свет. У гэты дзень мы аддаём даніну павагі нашым продкам, якія стварылі фундамент беларускай адукацыі і пісьменства.
У Гомельскім ліцэі будаўнікоў таксама адбыўся шэраг мерапрыемстваў, прысвечаных юбілейнаму XXV Дню беларускай пісьменства. Выкладчыкамі Казловай Інай Рыгораўнай, Беляковай Аленай Аляксееўнай, Бернадскай Натальяй Пятроўнай былі падрыхтаваны для навучэнцаў 1-га і 2-га курсаў падарожжа-віктарына «Па гарадах Беларусі», інфармацыйны дайджэст «400-годдзе першага ў свеце «Буквара»,які мае беларускае паходжанне», а таксама медыяпраекты «500 год гісторыі беларускага кнігадрукавання» і «Францыск Скарына – чалавек свету». Праведзеныя мерапрыемствы спрыялі фарміраванню грамадзянска-патрыятычных і духоўна-маральных якасцей асобы навучэнцаў, папулярызацыі гісторыка-культурнай, духоўнай спадчыны народа і дасягненняў Рэспублікі Беларусь, выхавання ў падрастаючага пакалення пачуцця гонару за сваю малую радзіму і яе герояў.